ÁNGELES JORRETO

Naceu en Ourense e estudou e residiu aquí ata 1965. Comezou a pintar desde moi nena empregando xa diversas técnicas. O seu pai, moi aficionado á fotografía, tamén a introduce nese mundo de captación instantánea.

En 1965 fixa a súa residencia en Vigo pero, de espírito inqueda, non para de viaxar polas grandes cidades europeas para enriquecer a súa obra e pintura.

Comeza a traballar diversas modalidades como a serigrafía, gravado e de aí a pinturas de grande formato. Tamén é unha das fundadoras da ARGA (Artistas Plásticos Galegos) e organizou o I Encontro da Arte lembrando a Rosalía. Logo virían outros consecutivos.

En 2008 comeza expor nas grandes capitais europeas como París no Carrusel du Louvre e en Salzburgo Kunstmesse, en Utrecht Art Fair, en Innsbruck Art Innsbruck.

Ten no seu haber numerosas exposicións con cadros de temática abstracta, paisaxes e figuración humana. Tonalidades cálidas, pinceladas expresivas e notorias no seu trazado nas que desaparece o debuxo. Cadros de expresión e sensación. Especialmente emotivas son as pinturas nas que representa os rostros de mulleres con trazos sinxelos, intuitivos.

Vid: Ángeles Jorreto

VICTORIA JUNQUERA ENRÍQUEZ

Naceu en Ourense o 21 de setembro de 1911 e era filla de Julio Junquera. Aos doce anos, o 18 de setembro de 1923, realizou o exame de ingreso para o Instituto Xeral e Técnico de Ourense. Matriculouse durante seis anos de forma oficial. Tras realizar o bacharelato elemental solicitou o 5 de agosto de 1925 unha certificación académica  para o Conservatorio de Música de Madrid e realizou o estudos de música por libre  preparándose co organista da catedral de Ourense, Antonio Jausarás, e acadaría  unhas moi boas cualificacións en piano. En 1926 comezou os estudos de bacharelato universitario, rematándoos en 1929 e nese mesmo ano solicitou unha certificación para a Normal de Ourense.

Comezou a exercer de mestra polas escolas da provincia tras realizar os cusiños de maxisterio. Traballou na escola das Pías, en Maceda, na escola de Atanes en Cualedro...

O 10 de abril de 1934 casou con Miguel Sanz que era Axudante de Obras Públicas e que estaba destinado en Palencia pero Victoria non quixo deixar de dar clases polo que pediu traslado a Palencia e exerceu na escola de Celada de Roblecedo.

Victoria era unha virtuosa pianista e chegou a facer interpretacións públicas no Teatro Losada co gallo de diversas homenaxes que se organizaban. Tamén deixou escrito un libriño titulado "Apuntes Folklóricos" editado en 1930 que é un Manuscrito co Cuestionario xeral do Folklore e que está no fondo da Fundación Vicente Risco. 

(Elaboración propia a partir de diversas fontes)

Vid: Benso Calvo, Carmen e Cid Galante, Rosa María, "Los expedientes de las estudiantes de bachillerato una fuente básica para el estudio del alumnado femenino de los institutos. Ourense como ejemplo (1900-1930)", Revista Historia de la Educación, 26, 2007, pp. 437-470; La Región, 12 de abril de 1934; La Región, 27 de xuño de 1937; El pueblo gallego, 8 de decembro de 1939.

CHELITO JUIZ

Tampouco faltaban en Ourense candidatas aos concursos de misses tanto nacionais como rexionais que se convocaban cada ano. Candidatas sempre houbo e hoxe no blog incoporamos algunha delas, como é o caso de Chelito Juiz. 

El Pueblo Gallego, 2 de Febreiro de 1933

CARMEN JEREZ RODRÍGUEZ

Natural da Fervenza (Vilamartín de Valdeorras), pertencente a unha familia marcada pola represión. En 1944 estivo presa en Ourense por colaborar cos guerrilleiros, despois do combate que tivo lugar nesta aldea onde resultou morto un fuxido, Manuel Rodríguez Rodríguez. Era a compañeira de Abelardo Macías, “Liebre”, un guerrilleiro do Bierzo da Federación de Guerrillas León-Galiza. En xullo de 1946 levárona a Rúa-Petín, onde estivo retida dous meses, e despois a Ponferrada. Dez meses despois, en maio de 1947 apareceu o seu cadáver en avanzado estado de xestación nunha cuneta de Montearenas, perto de Ponferrada, un lugar onde foran executados e sepultados moitos republicanos. A coñecida como "Chelo" narraba o impacto que lle produciu a morte de Carmen:

"La Carmen de Fervenza, que asesinaron, éramos muy amigas...No sé como se dejó coger, tan valiente que era...Cuando la mataron, ay, yo pasé...,lo pasé mal. Ella vendía leche a la lechera...Siempre nos veíamos en El Barco...Para aquí...bueno están allí y vienen tal día, o pasan tal día, tal día esto, tal día aquello...Pasaba por unas huertas y venía a mi casa...Bueno, en tal sitio están, puedes ir a verlos...Éramos muy amigas. Ella era la novia de Abelardo...Lo quería mucho, y Abelardo a ella también...Mira como la mataron, violándola todos y de un lado a otro y cuando estaba encinta de cuatro meses la llevan y la matan en el Montearenas"

Vid: Memoria de mulleres. Album de mulleres
Gurriarán, J. A., As mulleres do monte, Vigo, Galaxia, 2015, p. 224-225.

ÁNXELES JORRETO VEIGA

Naceu en Ourense e en 1965 estableceuse en Vigo, cidade na que intensifica a súa produción artísitca a través da investigación de diversos materiais e buscando novas formas para inserir nos seus traballos, centrados principalmente na pintura. A súa formación foi autodidacta e realiza as súas primeiras exposicións en 1990 mentres se forma como conservadora preventiva de bens culturais no Museo Municipal Quiñones de León e promove varios cursos de pintura e artesanía. Exhibiu a súa obra en Vigo, Ourense, Pontevedra, Tui, Madrid, Bilbao, Milán...é membro da Asociación de Artistas Plásticos de Vigo, da Federación Internacional de Artistas Plásticos de Barcelona e socia fundadora da Asociación de Artistas Plásticos Galegos.  Segundo Pedro Solveira, a obra de Anxeles caracterízase pola súa espontaneidade, o pincel é libre e voa por un mundo vexetal que o invade todo. Francisco Pablos indica que os temas simples teñen certo intimismo a pesares do seu quente cromatismo.
Vid: Enciclopedia Galega, Apéndice 2000-2005, tomo 38.

ROSA JARES HERRERO

Naceu en Mourisca (Viana do Bolo) o 15 de febreiro de 1909. 

No ano 1928 matricúlase na carreira de Farmacia pero nos Rexistros de Matrícula so consta que realizou un curso por libre pero grazas á información facilitada poa súa neta, Marta Martínez, que se puxo en contacto con este blog, sabemos que Rosa Jares rematou a carreira de Farmacia en tempos da República (conservando a familia o seu título) e que se colexiou no Colexio de Farmacia co número 40.

Exerceu en Viana do Bolo, na farmacia situada na Praza Maior, ata os anos 1975-76. Casou con Manuel Pérez Puga e tiveron catro fillos: María Rosa, José Manuel, Herminda e Concepción. 

A fotografría da entrada foi cedida por Marta Martínez, neta de Rosa Jares. Desde aquí agradezo encarecidamente a súa colaboración así como do resto da súa familia. As palabras non chegan a demostrar o que para min significa esta axuda, así que, Marta, unha aperta grande.

Vid: Cid Galante, Rosa María, "As primeiras ourensás ante o reto da educación universitaria (I e II), en Revista Minius.
Fleire Quintas, Laura, Aportación a la Historia de la Farmacia en la provincia de Orense, traballo presentado na Facultade de Farmacia da Universidade Complutense en 2016, p.59, 233.
El Correo gallego, 20 de agosto de 1955.