HERMINIA DOMÍNGUEZ GONZÁLEZ

Herminia Domínguez González naceu en San Xoan do Río en 1965 e é catedrática e investigadora acérrima. Exerce como profesora na Facultade de Ciencias no Campus de Ourense e é unha das mellores investigadoras de España no eido das Ciencias e da Tecnoloxía dos alimentos.Os seus estudos son os máis citados nas investigacións que se están a levar neste campo. Herminia mantense no ranking das 427 mellores investigadoras de España.

Ingresou o 16 de marzo de 2022 na Real Academia Galega de Ciencias (RAGC). A investigadora e docente da Facultade de Ciencias é a primeira muller científica técnica que accede a esta institución como académica numeraria e a primeira procedente do campus ourensán. 

A liña de investigación é o aproveitamento dos residuos de biomasa vexetal para obter produtos de interese na industria alimentaria e farmacéutica. Herminia Domínguez, avoga por ampliar e aplicar os coñecementos científicos que permitan desenvolver tecnoloxías máis limpas e eficientes para o fraccionamiento e conversión da biomasa renovable nas futuras biorrefinerías. Segundo ela é preciso un aproveitamento racional e completo da biomasa vexetal, especialmente da que está infrautilizada ou se considera un residuo, para avanzar cara á sustentabilidade non só porque reduce o seu impacto ambiental, senón porque pode converterse nunha materia prima renovable, contribuíndo a xerar riqueza local.

O labor que desempeñan as mulleres no ámbito da investigación é encomiable pois ben é sabido do arduo esforzo que supón. Malia os avances que se teñen dado no recoñecemento da muller na investigación é certo  que aínda hai diferenzas de xénero nestes ámbitos. Sabemos que a investigación é un exercicio vocacional pero moi complexo e de moitas horas de dedicación e ás veces non se ve moi recoñecido. Por iso, é loable traer a mulleres ourensás que persisten nese camiño de demostrar a súa valía pois abren o camiño a moitas outras.

Faro de Vigo
La Región

El Faro de Vigo

EVA FERNÁNDEZ MORÁN

Eva Fernández é filla de pai ourensán e nai canaria. Aos oito anos veuse para Ourense e residiu en Xeixalbo. Viaxiera desde moi nova por ter formado parte do Grupo Castro Floxo, unha escola e unha experiencia de vida para Eva.

Eva titulouse en Enxeñería Técnica Agrícola e cunha beca marchou a Coímbra onde contactou coa enxeñería do medio ambiente. Posteriormente fixo os estudos de Grao en Ciencias Ambientais en Salamanca.

Coa beca Erasmus foise a Berlín. Ao finalizar realizou un máster en Ciencias Ambientais en Glasgow. Natural Power apareceu na súa vida e desde entón realiza un traballo que lle encanta dentro do sector das enerxías renovables.

La Voz de Galicia

EVA DAFONTE

Considero moi interesante introducir no blog a mulleres ourensás moi novas que están tendo éxito na súa profesión. Este é o caso de Eva Dafonte que é enxeñeira informática que traballa na CERN e que foi galardoada co premio Ada Byron que concede o Cpeig.
Eva é experta en replicación de bases de datos usando Oracle Streams e na rede de computación de Gran Colisionador de Hadrones.
Vid: La voz de Galicia

EDITA DE LORENZO RODRÍGUEZ

Naceu en Ourense en 1968 aínda que a súa familia é de Nogueira de Ramuín. Os seus pais emigraron a Suiza e regresaron a Galicia cando Edita tiña cinco anos. A familia instalouse en Vigo, o seu pai comezou a traballar nos Asteleiros. A Edita gustábanlle as matemáticas e física e comezou en Vigo a carreira de TELECO cando acababan de instaurarse estes estudos en Vigo. Dos 125 matriculados, vinte eran mulleres e, entre elas, estaba Edita. Ao rematar a carreira trasladouse a Boston para realizar parte da súa Tese de doutoramento. Actualmente ocupa o cargo de Directora da Escola de Teleco en Vigo. Unha carreira e un cargo que é un reto para unha muller cando sempre se asociaron as enxeñerías para os homes. Unha das liñas nas que investigou foi a de deseñar unha técnica para detectar o cancro de mama.
Vid: Xornal, 5 de setembro, 2010.