PURIFICACIÓN SÁNCHEZ ALONSO

Este blog ten a pretensión de facer destacar a todas a mulleres ourensás de todos os ámbitos coa finalidade de resaltar o seu papel na sociedade. Moitas das actividades, accións, pretensións e iniciativas viñeron da man de mulleres pero, lamentablemente, ao longo da historia nunca se lles deu a relevancia debida. Así como os feitos dos homes eran sumamente destacados, o das mulleres quedaban relegados ao seren considerados actos menores.

Purificación foi unha muller con iniciativa e deixou a súa impronta na historia da nosa provincia. Naceu en 1945 en Vilanova, Pobra de Trives, e rexentou desde moi nova co seu home unha panadería. Traballo e familia foron os asuntos máis relevantes para Purificación pero amais disto tamén tivo tempo para levar a cabo iniciativas culturais na súa comarca.

Foi unha das persoas fundadoras do Orfeón de Trives. Tamén era compoñente do grupo Macizas Centrais, nome que xa nos indica que fala de mulleres con maiúsculas e amantes da cultura galega. Mulleres que levaban os cantos tradicionais alí onde as requirían. O teatro foi outra das facetas ás que se dedicou formando parte da agrupación Carniceira.

Purificación, no seu trazado vital, demostrou a súa defensa polas mulleres.

Faleceu en xuño de 2022 pero a xente da comarca non a vai esquecer.

(Elaboración propia)
Foto: La Región