Naceu en Ourense o 28 de novembro de 1900 e era filla de Amador López natural de Barra, Coles, de profesión xastre e de Amparo Bello Carballo que era de Ourense e tiña o título superior de mestra. Os pais de Carmen casaron o 27 de febreiro de 1900 e tiveron catro fillos, Antonio, Carmen, Amadeo e Eumberto.
A nai de Carmen comezou a exercer a docencia desde 1899 con trece anos e estivo en diversas escolas da provincia[1], na escola de Noveas, no concello de Blancos, en Riobó, en Nocelo, e como mestra en propiedade na escola de Tosende. Esta faleceu o 29 de agosto de 1927.
Carmen ingresou na Escola Normal de Mestras de Ourense o 2 de xuño de 1917, cando tiña dezasete anos, e uns cursos fíxoos por libre e outros por oficial. Rematou os estudos en 1926. Realizou as prácticas escolares coa mestra de Cartelle María de la Torre Acha entre 1917 e 1918 e coa mestra nacional de Ourense Felisa Rodríguez Rodríguez entre os anos 1919 e 1920. Solicitou a expedición do título o 7 de abril de 1927[2].
Na memoria de prácticas demostrou ter un concepto pedagóxico baseado na experimentación práctica e na aprendizaxe por intuición na liña dos grandes pedagogos como Pestalozzi, Fröebel ou Rousseau e puña de relevo que a propia natureza ofrecía un amplo campo de investigación para o saber: “El conocimiento de las cosas, la enseñanza de las cosas, debe hacerse ante las cosas mismas, porque dan la imagen, porque dan exactitud, porque ahorran tiempo…”. Tamén amosou a súa crítica polos poucos recursos cos que contaban as escolas:
“…Claro está que las Escuelas todavía no están dotadas del material auxiliar en consonancia con la capacidad de los niños y con la extensión que debe dársele a estos conocimientos en la Escuela Primaria. El ideal a que debe aspirarse es a la dotación completa dentro de lo posible de todo lo que signifique facilidad en la enseñanza y disminución del tiempo…”[3].
Non é estraño, polo tanto, que Carmen atopara en ATEO un marco idóneo onde poñer en conxunción as súas modernas ideas pedagóxicas con outros docentes entre os cales estaba tamén o seu irmán Amadeo. A máis disto a súa implicación coa Asociación de Traballadores de Ensinanza de Ourense foi notablemente destacada pois acabaría ocupando o cargo de vogal en 1935 xunto con Delia Osorio.
Carmen accedeu á docencia e en 1929 estivo de interina en Fronfe, Molgas. Despois, en 1932, presentouse aos cursiños de selección profesional do maxisterio e, en 1933 déronlle destino para a escola de Mones, no Concello de Petín e, en 1934 na mixta de Coutiño en Parada do Sil.
Estaba Carmen exercendo na escola de Parada do Sil cando o 8 de agosto de 1936 sería destituída, como o resto dos seus compañeiros de ATEO. O inspector Alfonso Iniesta Corredor, secretario da Comisión Depuradora, certificou o 26 de agosto dese ano que Carmen López era de “ideas comunistas”[4] .A partir de entón a actuación da Comisión Depuradora comezou o seu proceso burocrático para proceder á sanción definitiva e, máis do mesmo, o Delegado militar e Comandante de Parada do Sil asegurou que a mestra era de ideas comunistas[5] e, non quedaría atrás o párroco de Parada do Sil, quen ratificou a acusación de comunista e de que pertencían á Fronte Popular:
“…Fue propagandista del comunismo en la escuela y en la calle y en todos los actos de su vida…que en vísperas del levantamiento nacional, o antes de vacaciones, trabajaba en la constitución de una célula comunista…trabajó incansablemente en atraerse adeptos a su partido, hablando encomiasticamente de Rusia y desproticando contra todo sistema moral, religioso y social, por anticuado y frenador de la humana libertad…”[6].
As acusacións sucedíanse, seguro que presionados polas propias autoridades que actuaban de brazo opresor ou porque se vían reafirmados e recompensados por contribuír ao espírito e orde que se impuña. O pai de familia de Coutiño tamén argumentou que a mestra fixo propaganda disolvente na clase diurna, que o seu labor na escola era regular e que era anticatólica[7]. Incluso se sumou o párroco de Mones, onde estivera Carmen exercendo e dixo que “Fuera de la escuela hacía propaganda extremista, demostrando ser muy entusiasta del laicismo y de la coeducación en la enseñanza…su labor fue bastante aceptable, sólo deficiente en la moralidad”.[8].
En conclusión, don Emilio Nieto Rodríguez, vogal secretario da Comisión declarou: “Carmen López Bello figura afiliada a la A.T.E.O, siendo elegida para la directiva del consejo provincial con el cargo de vocal 3º, el 22 de diciembre de 1935”[9].
Desde logo Carmen xa non ía poder librarse da sanción e os cargos contra ela foron: que pertenceu ao partido comunista de cuxa agrupación local fora secretaria e tamén que era unha propagandista do comunismo na escola; que traballou para a creación dunha célula comunista; que era atea e que figuraba afiliada e directiva da ATEO[10]. Por todo isto resolveuse o 2 de febreiro de 1940 que Carmen quedaría separada definitivamente do servizo e se procedería a darlle a baixa no escalafón respectivo[11].
Tras o seu cese punitivo Carmen foi residir a un pobo de Pontevedra e de aí daría o salto a México continuando coa súa militancia, agora na F.E.T.E de México. Como integrante da mesma asinou a declaración que o grupo da Federación Española de Traballadores do ensino de México fixo pública na que se condenaba ao réxime da ditadura en España e contra o pacto ianqui-franquista na que se dicía:
Como educadores españoles, seguimos entrañablemente a nuestro pueblo en su lucha por la libertad, y expresamos en esta hora decisiva para el porvenir de España, nuestro repudio incondicional contra el pacto…
Al formular esta acusación justiciera, nos dirigimos a todos nuestros compañeros de todos los grados de enseñanza, invitándoles a que formulen su protesta enérgica contra el pacto…y a que formen un Frente Nacional de lucha implacable contra el franquismo, puesto que sólo la derrota y el aniquilamiento de su régimen, permitirá a España reconquistar su libertad…[12]
Carmen integraría ese conxunto de docentes aos que se lles arrebatou o futuro. Foron acusados de xeito furibundo polo goberno civil ourensán de non ser neutrais, de inculcar aos seus alumnos ideas marxistas, cheas de odio e rancor, envelenando as mentes infantís chegando a transformalos en futuros cidadáns deshonrosos:
…renuevos de la Patria en vez de ser en un futuro ciudadanos honrados, virtuosos, abnegados, obedientes e disciplinados, amantes del orden público, aseguradores de la paz y fomentadores de todos los intereses morales y materiales, depositarios y transmisores de las tradiciones sociales y políticas de nuestra querida España, lazos estes que dan origen al patriotismo verdadero y que hacen a un pueblo próspero y feliz, serían en cambio seres degradados en extremo, impíos antipatriotas, profesionales del crímen, amantes del terror, esbirros revolucionarios al servicio moscovita, enemigos acérrimos de la fuerta, vigor e independencia de nuestra Patria…[13]
[1] Boletín Oficial de la Provincia de Lugo, 24 de xaneiro
de 1906, p. 3; Boletín Oficial de la Provincia de Lugo, 31 de agosto 1912, p.
2; [2] Arquivo
da Universidade de Vigo, “Expediente académico de Carmen Bello” [3] Idem; [4] MINISTERIO DE CULTURA, Arquivo Xeral da Administración, 32-2784-042-0006; [5] MINISTERIO DE CULTURA, Arquivo Xeral da Administración, 32-2784-042-0013; [6] MINISTERIO DE CULTURA, Arquivo Xeral da Administración, 32-12784-042-0007; [7] MINISTERIO DE CULTURA, Arquivo Xeral da Administración, 32-12784-042-0010; [8] MINISTERIO DE CULTURA, Arquivo Xeral da Administración, 32-12784-042-0005; [9] MINISTERIO DE CULTURA, Arquivo Xeral da Administración, 32-2784-042-0014; [10] MINISTERIO DE CULTURA, Arquivo Xeral da Administración, 32-2784-042-0015; [11] MINISTERIO DE CULTURA, Arquivo Xeral da Administración, 32-2784-042-0004; 12] “Declaración de F.E.T.E.”, España Democrática :
Por la paz, por la democracia, por la independencia de España, 17 de decembro
de 1953, p.2. Tamén asinarían esta declaración Luís Soto Fernández; Regina
Lago; [13] “Nota oficiosa del Gobierno Civil de la Provincia”, La Región, 4 de setembro de 1936, p. 2.
(Elaboración propia. Forma parte dun artigo rexistrado).
