ADELA BOO GALLEGO

Naceu en San Lorenzo de Piñor, Barbadás, o 10 de febreiro de 1904. O seu pai consta como propietario e súa nai era Balbina Gallego Méndez que faleceu en maio de 1963 aos 88 anos. O matrimonio tiña dúas fillas, Eugenia e Adela.

Adela realizou o 15 de xuño de 1923 o exame de ingreso ao Instituto ourensán e, posteriormente, matriculouse nos seis cursos para titular no curso 1926-1927. Entre 1926 e 1928 compaxina os estudos en Ciencias e Farmacia e facendo cursos por libre e outros por oficial. No ano 1934 acadou a titulación[1].

Abriu en 1939 a súa farmacia no número 6 da rúa Marcelo Macías de Ourense. Indicaba a prensa da época que pola súa magnífica situación e polos seus avances na montaxe así como polo prestixio profesional de Adela Boo, a farmacia sería un referente na cidade e contaría cunha numerosa clientela[2].

No ano 1943 Adela Boo foi autorizada para o despacho na súa farmacia das receitas da Beneficencia Municipal [3].

Adela exerceu a súa profesión con entrega ata a súa xubilación. En efecto, era unha muller apreciada na cidade polo trato coa clientela.

[1] A.I.O.P. Expedientes persoais dos alumnos iniciados en 1922. 32/2.8;  A.H.U.S, Expedientes persoais. Cartapacio 0146. Exp. 27.[2] Nueva Farmacia. ( 1939, 8 decembro). La Región,  p. 2[3] Sesión del Ayuntamiento. ( 1943, 3 febreiro). La Región, p. 2.