Ao remate da carreira, en 1937, obtén praza de mestra en Corexido (A Veiga), Ourense. En 1944 pasou a exercer na escola da Manchica, A Merca.
No ano 1957 concédeselle a saída de España polo que gozaba do dereito a poder emigrar formando parte do gran cupo de pobación española que nesa época se encamiñaba, maiormente a Europa. Pero, non é seguro que marchara e se o fixo, puido ser que estivese fóra moi pouco tempo. O caso é que en 1963 estaba exercendo como mestra no pobo de Espiñeira, O Irixo, e por concurso de traslados destinárona a un pobo de Asturias, concretamente á escola mixta de Tandes no Concello de Cangas de Narcea, Oviedo.
Como se dicía, Purificación González, en 1934 colaborou no número 123 da revista Nós, na sección "Archivo filolóxico e etnográfico de Galiza". Escribe o conto "O corpo do delito" , un breve conto de Penosiños de Ramirós sobre uns bandidos que na primeira guerra carlista secuestraron ao cura de Santa Mariña a Graña e levárono ao monte. Mentres tanto a reitoral foi ocupada polos xefes e as súas mulleres, pasando alí unha tempada. Cando o abade pagou o rescate deixárono libre e ao voltar queimou todas as camas que había na casa.
Trátase dunha redacción breve e concisa pero escrita nun galego coidado e cuase normativo, isto é, con certo afastamento dun galego coloquial e costumista. Mais apréciase ese interese por diferenciar o galego da lingua castelá pola aparición de hiperenxebrismos o que denota querencia polo idioma.
Nós, 15 de marzo de 1934, nº 123, p. 57.