ROSA BLANCO LAMELA

Rosa naceu en 1888. Foi sometida a Consello de guerra por agochar a fuxidos.  Era unha muller moi temperamental e de carácter que non dubidaba enfrontarse á garda. Sábese que o 14 de xullo de 1936 increpou a un garda urbano cando levaba a un home detido cara o Concello, Rosa increpouno e tratou de agredilo. Rosa foi detida o 4 de abril de 1937 na súa casa a Rúa da Liberdade número 29 acusada por agochar a José González Tesouro, "Machadiña", un dos escapados máis buscados do Concello de Allariz, era directivo da Sociedade de Ousende e un dos homes de confianza de Benigno Álvarez. 

O 23 de xullo de 1937 tivo lugar o Consello de Guerra que se celebrou no Paraninfo do Instituto de Ourense. Ese día ía celebrarse diversos procesos contra: Vicente Iglesias, Aurelio Penelas, Daniel Outeiriño  Araújo para os que se pediu a cadea perpetua. Contra Manuel González Rodríguez para o que se pediu a "última pena". Finalmente, contra José González Tesouro, Etelvino Diz e Rosa Blanco. O fiscal pedíu para José a pena da cadea perpetua, para Etelvino a absolución e para Rosa unha pena de  12 anos e 1 día de cadea.

(Fonte: La Región, 24 de xullo de 1937, p. 3)

(Fonte: AHPOU/1.1.5.4.2.1.//7209/13)

Vid: Prada Rodríguez, J. "As mulleres e a resistencia antifranquista (1936-1945)" en De Juana, J. e Prada Rodríguez, J. (dir.) As mulleres en Galicia no século XX, Vigo, Ir Indo, 2011, pp. 183; "De la Comisaría", El Pueblo Gallego, 15 de xullo de 1936. p. 6.